Ensekirite: Kòdinasyon Lwès Pati Federalis(PF) mande otorite yo pou pran responsablite yo

0 47

Nan yon nòt pou laprès li mete deyò nan dat madi 8 Jen 2021 an, Kòdinasyon Lwès Pati Federalis (PF), fikse pozisyon li sou fenomèn ensekirite a k ap vale teren nan peyi a. PF denonse silans otorite yo devan masak nèg ak zam ap fè nan katye popilè yo. Pati a mande otorite yo pou pran responsablite yo pou san sispann koule nan peyi a.

            Nòt pou laprès 

Kòdinasyon lwès Pati Federalis (PF) salye tout medya alawonnbadè e wete chapo l douvan bèl travay y ap fè e pou bon jan akonpanyeman yo pa janm sispann bay popilasyon an sitou nan moman difisil sa peyi an ap travèse la.

Lè nou gade jan machin ensekirite an ap vale teren nan peyi an sitou andedan depatman lwès lan, lè n gade jan nèg ak gwo zam fin pran kontwòl tout 5 awondisman lwès lan, nap mande kisa moun ki di yap dirije peyi sa ap regle?

Pati federalis pa janm sispann denonse silans ki fèt sou koze masak nan plizyè katye popilè andedan lwès lan tankou : site solèy , Bèlè , Lasalin ak 3e sikonskripsyon Pòtoprens lan nou di se twòp atò. Jodi a ankò kòdinasyon lwès pati federalis mete vwa l ansanm ak moun matisan, fontamara ak tout zòn ki pre li yo pou di nou pa kapab ankò. Nou bouke wè san koule, nou bouke wè kay malere ak malerèz kap boule, nou bouke travèse kadav gate, nou bouke wè manman kap kouri toutouni ak pitit sou bra yo, nou bouke, nou bouke.

Nap pwofite mande responsab lapolis ki la toujou yo pran responsablite yo, responsab jistis yo , sekirite piblik yo , CSPN nan pran responsablite nou paske nou paka desann pi ba ke kote nou gentan rive la.

Yon jou la jou

Viv Ayiti
Viv pati federalis

Pastè Joseph Yves Junior Barthelemy : Kòdonatè lwès Pati Federalis

Laisser un commentaire

Votre adresse email ne sera pas publiée.

This website uses cookies to improve your experience. We'll assume you're ok with this, but you can opt-out if you wish. Accept Read More