Mobilizasyon: Yon premye jounen ki wè anpil moun sou beton an

0 123

Sou kout lanbi rasanbleman anpil sektè nan sosyete sivil, popilasyon ayisyèn nan yon lòt fwa ankò mete pye l atè jodi dimanch 28 mas 2020, pou mande pouvwa aktyèl la li gen nan tèt li Jovenel Moïse, respekte manman lwa peyi a.

Li te 10zè nan maten, lè anpil sitwayen ak mayo blan yo te kòmanse reyini sou plas konstitisyon an sou Channmas pou te kòmanse mobilize ak pankat epi drapo nan men. Manifestasyon sa ki te demare sou animasyon kèk machin mizikal, te pran direksyon wout Lali, pase sou wout Nazon pou t al rankontre ak gwoup ki te deja ap mobilize nan kafou rezistans lan (kafou Ayopò).

 » Vòlè ki nan palè a fò l ale « , se te youn nan chan anpil militan t ap chante sou tout pakou a.

Rive nan nivo kafou ayopò pou pran direksyon Dèlma, anpil kawotchou te boule, militan yo mete tout sa yo jwenn nan mitan wout la yon fason pou krache kòlè yo fas ak pouvwa an plas la yo kalifye sanginè.

Yon sèl manifestasyon, anpil revandikasyon.

« Nou mande sali piblik, se sè l yon pouvwa sali piblik ki ka retire peyi a nan sa l ye la », deklarasyon yon sitwayen ki kenbe nan men l foto ansyen prezidan repiblik la Jean Bertrand Aristide, ki se tou fondatè pati politik « Lavalas ».

« Fòk Jovenel Moïse degaje l kite palè a, pou nou enstale yon gouvènman tranzisyon k ap gen misyon fè eleksyon ak posè masak lasalin, petwokaribe elatriye, yon tranzisyon ripti se sa nou mande ». Militan sa, se mayo blan l ki make AAA, ki se pati politik ansyen senatè Youri LATORTUE.

Plizyè figi koni anndan peyi a te fè aparisyon yo sou beton an pou vin bay sipò pa yo ak manifestasyon sa, pami figi sa yo te gen responsab radyo Métropole la ki se Richard Widmaier, te gen prezans Josué Merilien, Moïse Jean-Charles, Sorel Jacynthe elatriye

Sou tout pakou yo, militan yo te rache tout pankat ki t ap fè lòbi pou referandòm Jovenel Moïse ap preche depi kèk tan.

Manifestasyon sa t ale bout menm kote a sou Channmas. Lapolis te itilize gaz lakrimojèn nan fen manif sa pou gaye yon ti gwoup militan ki t ap riposte.

Apre premye jounen mobilizasyon sa, randevou kase lendi 29 ak madi 30 pou mobilizasyon yo kontinye.

Laisser un commentaire

Votre adresse email ne sera pas publiée.

This website uses cookies to improve your experience. We'll assume you're ok with this, but you can opt-out if you wish. Accept Read More