« Palè nasyonal pa t oblije teyorize popilasyon kwadèboukè a pou l fè Arnel sove », deklare Pierre Espérance.

0 154

Aprè pòt pawòl lapolis la Garry Desrosiers fin konfime chèf gang Vilaj de Dye a, Arnel Joseph chape poul li aprè gwo deblozay sa ki te pete jou ki te jedi 25 fevriye a nan prizon sivil kwadèboukè, Pierre Espérance ki se nimewo 1 Rezo Nasyonal k ap Defann Dwa Moun (RNDDH), akize palè nasyonal kòm premye konplis evazyon sa pou te ede Arnel Joseph sove.

« Li bon pou konnen tout detay sou fim sa, sou teyat sa ke pouvwa fè nan prizon kwadèboukè » deklare Pierre Espérance nan mikwo radyo Magic 9. Li te pwofite tou pou l voye mo senpati l bay fanmi moun ki gen pwòch yo ki tonbe nan sikonstans sa, espesyalman fanmi chèf prizon an Paul Joseph Victor.

« Nou panse yo te kapab ouvè pòt prizon an bay Arnel sòti san yo pa t oblije teyorize prizonye yo » .

Pou apiye pawòl sa Pierre Espérance retounen nan mwa jiyè 2019 avan arestasyon Arnel.

« Lapolis Jidisyè te fè yon rapò sou yon ka kidnapin kote ke te genyen senatè Gracia DELVA ki enplike ladan l ».

Pierre Espérance eksplike, « Lè yo vin arete Arnel nan lopital « Bonne Fin » pou mennen l resevwa swen nan lopital Bernard Mevs, anpil otorite te vizite l pou pale avè l pou di l pa pale pandan yo ba l garanti l ap sòti » sou baz sa Pierre Espérance chita pou l di « Otorite leta yo pa t ap kite Arnel nan prizon paske l te gen lyen ak anpil gwo otorite ».

Pierre Espérance fè konnen tou li te alète direksyon administratif penitansye (DAP) a nan yon lèt sou sitiyasyon Arnel nan prizon an.

« Nan mwa septanm 2020, nou te enfòme direktè DAP la sou ka Arnel Joseph la, e nou menm nan RNDDH nou te gen enfòmasyon ke Arnel ap kite prizon an nenpòt ki lè, menm jan tou administrasyon penitansye a te konnen » .

« N ap raple pandan 2 fwa, mwa jwen ak mwa jiyè, Arnel te fè videyo voye bay ekip li pou di l pa vin rete nan prizon e l ap sòti nan nenpòt ki mwayen. Pou nou menm sa k pase a se sèl palè nasyonal ak direktè lapolis la ki kapab di sa k pase a ».

Defansè dwa moun nan fè konnen pouvwa te kapab itilize menm estrateji yo te itilize pou Fednel Monchery , ansyen direktè jeneral ministè enteryè a ke yon patwouy lapolis te arete sou lali 13 fevriye 2021 pase a.

« Yo te kapab ouvè pòt prizon an mete Arnel deyò, menm jan yo fè jou ki te samdi 13 fevriye q pou ansyen direktè jeneral ministè enteryè a Fednel Monchery ki enplike nan plizyè masak nan zòn metwopolitèn nan pami yo lasalin, e se li menm tou ki mete gang krache dife kanpe nan ri sen maten ». Deklarsyon Mesye Espérance.

Daprè envite a sou Panel Magic, Arnel se te yon pyès anbarasan pou pouvwa an plas la.

« Rejim PHTK pa vle gade Arnel nan prizon paske Arnel travay pou yon pakèt otorite nan pouvwa e Arnel se yon eleman ki anbarasan ki jenan ki ta kapab mete yo nan yon sitiyasyon ki vrèman difisil ».

Prizon kwadèboukè a ki se prizon ke yo ta konnen kòm prizon ki pi byen sekirize nan peyi Dayiti. Pierre Espérance fè konnen sa k te fèt la t ap toujou fèt, nenpòt jan nivo sekirite a ta ye nan prizon an.

« Prizon kwadèboukè a se yon prizon ke kanadyen yo konstwi. Kapasite l se mwens pase 900 moun, anviwon 870. Te gen 1532 moun avan pouvwa te prepare sa l te prepare yè a, tout sa k te planifye te planifye anndan avèk deyò. Menm si te gen kamera yo t ap fè menm bgy yo ».

N ap raple w evazyon li nan prizon sivil kwadèboukè a, pòt pawòl lapolis Garry Desrosiers konfime bay laprès ke ansyen chèf gang Vilaj de Dye a bwè dlo bouch li yè anba bal lapolis nan lestè nan depatman latibonit

Maxime Louissaint

Laisser un commentaire

Votre adresse email ne sera pas publiée.

This website uses cookies to improve your experience. We'll assume you're ok with this, but you can opt-out if you wish. Accept Read More