Popilasyon an kontinye mache pou di non ak « Diktati »

0 29

Yè vandredi 19 fevriye 2021 an, anpil sitwayen te mete pye atè yon lòt fwa ankò pou di non ak Diktati epi raple ak Jovenel Moïse yo pa rekonèt li kòm prezidan nan tèt peyi a ankò.

Rasanbleman pou mach sa te fèt sou Channmas douvan fakilte etnoliji. Militan yo ak pankat nan men te pran direksyon ri chavàn, pase avni kristòf, kafou tifou pou sòti sou lali. Rive sou wout lali, plizyè etidyan nan inivèsite pòtoprens (UP) yo menm tou te nan lari a ap manifeste pou mande liberasyon Abdias Edumé ke moun yo pa rive idantifye kidnape. Etidyan sa yo te deja ap vin rankontre gwoup sa ki t ap sòti nan nivo kafou tifou.

Kèk militan ak etidyan pami foul ki t ap sòti Etnoliji te refize fè yon sèl ak etidyan inivèsite pòtoprens yo. Daprè yo, etidyan sa yo pa janm pote solidarite ak mouvman ki konsène sosyete a oubyen lòt inivèsite leta yo. Sa ki ta pral koz branch ki t ap sòti sou channmas la refize pran wout pou monte lali, pou pran direksyon kafou pòs machan. Etidyan Inivèsite pòtoprens yo, bò kote pa yo te pran direksyon lali, yon gwoup ki pa t anpil menm jan gwoup ki te sot sou channmas la.

Pase pòs machan, monte solino, pase sou fò nasyonal, sòti sou avni poupla pou al tonbe lali anpil kawotchou t ap boule, wòch moso bwa te bare anpil kote nan wout la. Rive devan rektora inivèsite leta, militan yo te tire anpil wòch anndan lokal la, yon fason pou krache kòlè yo.

Nou te remake zòn pon moren, kèk endividi te met dife nan yon pikòp gri nisann fwontyè ki te gen plak sèvis leta 03279. Aprè aksyon sa, nan nivo kafou tifou ajan UDMO yo te bay anpil gaz lakrimojèn pou te gaye foul la ki te deja pran direksyon plas konstitisyon, kote mach sa ta pral pran fen.

Militan yo bay yon lòt fwa randevou dimanch k ap 21 fevriye a nan lari pòtoprens pou yon gwo manifestasyon kont pouvwa an plas la. Kafou Ayopò, Plas konstitisyon, se ap kèk pwen rasanbleman pou jounen manifestasyon sa.

Maxime Louissaint.

Laisser un commentaire

Votre adresse email ne sera pas publiée.

This website uses cookies to improve your experience. We'll assume you're ok with this, but you can opt-out if you wish. Accept Read More